ហេតុអ្វីអ្នកមាន និងបុគ្គលជោគជ័យចូលចិត្តក្រោកពីព្រលឹម?

Vannchhai Chenda 9:43:00 PM Add Comment Entrepreneur Edit

តាម ការសាកសួររបស់គេហទំព័រ Business Insider ទៅលើនាយកប្រតិបត្តិចំនួន ២៩ នាក់ បានបង្ហាញថា ពួកគេភាគច្រើនងើបពីព្រលឹមចន្លោះពីម៉ោង ៣ ដល់ ៧ ព្រឹក។ ពួកគាត់ភាគច្រើនងើបនៅមុនគូប្រជែង និងសហសេវិកទៅទៀតដើម្បីត្រៀមខ្លួនសម្រាប់គ្រប់យ៉ាងក្នុងថ្ងៃ ថ្មី។ បុគ្គលទាំងនោះយល់ថាការក្រោកនៅព្រលឹមល្អ តែអ្វីដែលពួកគេរឹតតែឲ្យតម្លៃទៀតនោះគឺ ថាតើការងារអ្វីដែលពួកគេត្រូវធ្វើពេលក្រោកចេញពីគ្រែ ដែលនេះបង្ហាញពីការគ្រប់គ្រងពេលវេលាបានល្អ។

បើតាមលោក Christop Randler មកពីសាកលវិទ្យាល័យអប់រំក្នុងទីក្រុង Heidelberg ប្រទេសអាល្លឺម៉ង់ បានឲ្យដឹងថា ការស្រាវជ្រាវជាច្រើនរកឃើញថា មនុស្សដែលចូលចិត្តងើបពីព្រលឹមជាទូទៅទទួលបានពិន្ទុល្អនៅសាលា ដែលធ្វើឲ្យពួកគេអាចបន្តចូលសាកលវិទ្យាល័យល្អៗ និងទទួលការងារល្អក្រោយបញ្ចប់ការសិក្សា។

ទាំងនេះជាមូលហេតុមួយចំនួនដែលនាំឲ្យបុគ្គលជោគជ័យ និងមហាសេដ្ឋីចូលចិត្តក្រោកពីព្រលឹម៖

១. ហាត់ប្រាណ

ក្រៅពីធ្វើឲ្យសុខភាពល្អ ការស្រាវជ្រាវមួយចំនួនបានរកឃើញថា ការហាត់ប្រាណ ឬរត់ពេលព្រឹកគឺល្អឲ្យរាងកាយត្រៀមខ្លួនឲ្យបានរួចរាល់ សម្រាប់ការងារដែលនឹងត្រូវធ្វើ រួមទាំងជួយកំណត់កម្រិតស្ត្រេសដែលអ្នកនឹងជួបនៅពេញមួយថ្ងៃផង។

២. អាចធ្វើការងារផ្ទាល់ខ្លួន

នាយកប្រតិបត្តិក្រុមហ៊ុនធំៗជាច្រើន ច្រើនយកពេលវេលាពេលព្រឹកមកធ្វើរឿងបុគ្គល ដែលពួកគេមិនមានពេលធ្វើនៅពេលថ្ងៃ។ ការងារទាំងនោះអាចឲ្យពួកគាត់រីករាយ និងមានសុទិដ្ឋិសម្រាប់ពេលបន្ទាប់ទៀតនៅកន្លែងធ្វើការ។

៣. ចំណាយពេលជាមួយគ្រួសារ

ការអង្គុយញ៉ាំអាហារជុំគ្នានៅពេល ព្រឹក ក្លាយជារឿងដ៏កម្រសម្រាប់សង្គមសម័យទំនើប ព្រោះជាទូទៅសមាជិកម្នាក់ៗរវល់នឹងការងារតាំងពីព្រលឹមទល់ព្រលប់។ ដូច្នេះពេលវេលានៅពេលព្រឹកនេះគឺល្អសម្រាប់ការនៅជិតកូនៗ និងមនុស្សជាទីស្រឡាញ់មុននឹងអ្នកត្រូវលាគ្នាទៅកន្លែងធ្វើ ការរៀងៗខ្លួន។

៤. បង្កើតទំនាក់ទំនង

នាយកប្រតិបត្តិម្នាក់ក្នុងចំណោម ២៩ នាក់ខាងលើយល់ថា ពេលព្រឹកជាឱកាសដ៏ល្អដើម្បីបង្កើនបណ្ដាញរបស់ខ្លួន។ វាជាពេលដ៏ល្អដែលអាចអង្គុយពិភាក្សា ឬជជែកគ្នាលេងជាមួយអតិថិជនសក្ដានុពល មិត្តភ័ក្ដិ និងក្រុមការងារក្នុងវិស័យដែលអ្នកធ្វើការ។ ណាមួយពេលវេលានេះអ្នកអាចអង្គុយញ៉ាំតែ ឬកាហ្វេដោយស្រួលចិត្តមិនចាំបាច់ប្រញាប់ប្រញាល់ថា ត្រូវដល់ម៉ោងធ្វើការដូចពេលថ្ងៃឡើយ។

៥. អានព័ត៌មាន

អ្នកមិនអាចមើលឃើញវែងឆ្ងាយទេ បើអ្នកមិនដឹងពីអ្វីដែលកំពុងកើតមាននៅជុំវិញខ្លួន។ បុគ្គលជោគជ័យក៏យកពេលនេះដើម្បីអានព័ត៌មាន ទទួលយកចំណេះដឹង និងដំណឹងថ្មីៗនៅជុំវិញខ្លួនពួកគេ។

៦. លើកគម្រោងថ្ងៃថ្មី

បើអ្នកមាន List អ្វីដែលអ្នកនឹងត្រូវធ្វើមុន និងបន្តបន្ទាប់ក្នុងមួយថ្ងៃពេញ វាងាយស្រួលសម្រាប់អ្នកព្រោះអ្នកដឹងថា អ្វីដែលត្រូវធ្វើមុន និងត្រូវធ្វើបន្ទាប់ អ្វីដែលមិនទាន់បានធ្វើ។ល។ ធ្វើបែបនេះអ្នកមិនចាំបាច់ត្រូវប្រញាប់ប្រញាល់ចេញពីការងារមួយ ចូលមួយដោយតក់ក្រហល់ ហើយអ្នកក៏អាចដឹងដែរក្រោយមួយថ្ងៃអ្នកធ្វើអ្វីបានខ្លះ។

៧. ធ្វើការលើគម្រោងដែលមានអាទិភាពជាងគេ

បុគ្គលជោគជ័យមួយចំនួនយកពេលវេលាពេល ព្រឹកនេះដើម្បីដោះស្រាយការងារលំបាកៗដែលជាអាទិភាព។ មូលហេតុដែលពួកគេជ្រើសយកពេលនេះគឺដោយសារវាស្ងប់ស្ងាត់ល្អគ្មាន ការរំខានពីបុគ្គលិក ឬសហការី។

៨. អានអ៊ីមែល

ពេលព្រឹកនេះ អ្នកក៏យកពេលខ្លីមកបើកមើលអ៊ីមែលណាអ្នកទទួល ហើយមិនទាន់ឆ្លើយតប។ ជ្រើសឆ្លើយតបអ៊ីមែលដែលជាអាទិភាពឆ្លើយតបទៅមុន។ អ្នកអាចដឹងថា ការងារនៅកន្លែងណាដែលត្រូវធ្វើ ហើយការងារណាដែលមិនទាន់ធ្វើ។

អូខេ! កុំទ្រមក់។ តោះ! ងើបចេញពីគ្រែ សម្អាតខ្លួន ស្រស់ស្រូបអាហារពេលព្រឹកហើយ រកមនុស្សដំបូងនិយាយពាក្យថា ”អរុណសួស្តី” ដើម្បីនាំសិរីសម្រាប់ថ្ងៃថ្មី៕