មនុស្សភាគច្រើនមិនហ៊ានក្នុងការចាប់ផ្តើមអាជីវកម្មដោយខ្លួនឯងនោះទេ ដោយសារតែពួកគាត់ភាគច្រើនប្រកាន់ភ្ជាប់នូវពាក្យថា “ខ្លាច” គឺខ្លាចបរាជ័យ ខ្លាចមិនអាចទៅរួច ខ្លាចបាត់បង់ទាំងការងារ បាត់បង់ទាំងទ្រព្យសម្បត្តិ ខ្លាចនេះ ខ្លាចនោះ ខ្លាចមិនចេះចប់មិនចេះហើយ។
ដូច្នេះ យើងសូមលើកយកផលវិជ្ជាមានមួយចំនួនដែលអ្នកគប្បីយកទៅត្រិះរិះពិចារណា និងធ្វើការសម្រេចចិត្តឲ្យបានត្រឹមត្រូវ។
១. អ្នកនឹងកាន់តែមានទំនួលខុសត្រូវ
ការចាប់ផ្តើមនូវអាជីវកម្មណាមួយដំបូង មិនថាអាជីវកម្មនោះមានទំហំប៉ុណ្ណានោះទេ អ្នកចាំបាច់ត្រូវមានទទួលខុសត្រូវគ្រប់ផ្នែកទាំងអស់ មិនថាហិរញ្ញវត្ថុ មិនបុគ្គលិក ឫការដំណើរការក្រុមហ៊ុននោះទេ។ ជាងនេះទៀត ភាពច្បាស់លាស់ ការស្រាវជ្រាវ និងការដឹកនាំ គឺជាអ្វីដែលអ្នកមិនអាចគេចផុតបានឡើយ ប្រសិនបើអ្នកនៅតែរំពឹងទៅរកភាពជោគជ័យនៃអាជីវកម្មនោះ។
២. អ្នកនឹងទទួលបានឱកាស
នៅពេលដែលអ្នកចាប់ផ្តើមអាជីវកម្ម អ្នកអាចនឹងមិនទទួលបានប្រាក់ខែយ៉ាងទៀតទាត់ ដូចដែលអ្នកធ្វើការងារឲ្យគេឡើយ ប៉ុន្តែអ្នកនឹងទទួលបានឱកាសសាងភាពមានបាន និងសេរីផ្នែកហិរញ្ញបានកាន់តែឆាប់។ លើសពីនេះទៀត អ្នកអាចនឹងក្លាយជាមនុស្សដ៏សំខាន់ក្នុងសង្គម និងសម្រាប់មនុស្សជុំវិញខ្លួន តាមរយៈការផ្តល់ការងារធ្វើដល់មនុស្សទូទៅ។
៣. អ្នកនឹងអាចមានលទ្ធភាពធ្វើអ្វីផ្សេងៗខុសពីអ្នកដទៃ
អ្នកដែលធ្វើការងារឲ្យក្រុមហ៊ុនពុំមានឱកាសធ្វើអ្វីផ្សេងទេ ក្រៅតែអំពីការងារដដែលៗ ដែលទាក់ទងនឹងជំនាញរបស់គេប៉ុណ្ណោះ ហើយពេលខ្លះវាពិតជាគួរឲ្យធុញខ្លាំងណាស់! ប៉ុន្តែសម្រាប់អ្នកដែលចាប់ផ្តើមអាជីវកម្ម តែងតែខិតខំរិះរកនូវអ្វីថ្មីៗ សាក់ល្បងអ្វីដែលគេគិតថាអាចទៅរួច ហើយវាហាក់បីដូចជា ការផ្សងព្រេងមួយដ៏អស្ចារ្យអញ្ជឹងដែរ។
៤. ភាពច្នៃប្រឌិត និងភាពឈ្លាវៃ
ក្នុងនាមជាសហគ្រិន អ្នកនឹងត្រូវសិក្សាស្វែងយល់រាល់បញ្ហាផ្សេងៗ និងការបង្កើតនូវអ្វីថ្មីៗ ដែលយើងហៅ “គំនិតច្នៃប្រឌិត” ដើម្បីធ្វើយ៉ាងណាឲ្យអាជីវកម្មរបស់អ្នកឈានឆ្ពោះទៅមុខជានិច្ច ពិសេស អ្នកនឹងមានភាពឈ្លាវៃក្នុងការបត់បែនតាមកាលៈទេសៈ។
មហាសេដ្ឋី Jack Ma ស្ថាបនិកក្រុមហ៊ុន Alibaba ដែលជាក្រុមហ៊ុន ទិញ លក់ផលិតផលអនឡាញដ៏ធំរបស់ប្រទេសចិនបានមានប្រសាសន៍ថា “នៅក្នុងកំឡុងពេលដែលអ្នកមានអាយុទើបតែ ២៥ឆ្នាំ កុំខ្លាចការចាប់ផ្តើម ហើយកុំខ្លាចការបរាជ័យ!!! ដួលងើបៗ ទើបអាចមានឱកាសទទួលបានជោគជ័យ៕”
0 comments:
Post a Comment